日本訂的貨到左啦~~

都好快, 3個星期就寄到黎, 貓貓有餐開啦~~~, 返去比條雞柳佢地食下, 睇下反應先

波仔回家的第2天

剷晒毛後成隻臘腸狗咁

尋日湊左佢, 帶佢去vet度檢查, 女醫生睇佢d牙齒話佢2個月大左右, 但寵物店話佢5個月wor, 如果2個月咪好大隻, 唔係toy? 唔知又比人呃呀, 已經有人介紹wor , 唉, 依家都無法啦, 唯有睇下佢 日後的成長,

返到屋企, 幾隻小鬼無我想像中咁緊張, 阿B直情睇左2眼就走入睡房瞓, 阿肥就離遠咁望佢, 公關細佬就痴埋個籠度八, 佢地真係門口貓, 之前阿妹剛回家, 佢地已伸手入籠"R" , 反而波仔佢地就唔係好敢, 直情入房食糧都唔肯, 都好, 起碼唔驚佢地"R" 佢

波仔都幾醒架, 食野真係好快, 唔會好似幾隻小鬼攪到我咁勞氣, 不過佢可能好不安, 成日吠, 但我地係佢附近佢就靜下來, 我地一出書房, 佢就吠過不停, 寵物店叫我地唔好理佢2星期, 唔係波仔就會覺得佢一嘈就會有人理佢, 以後好難攪, 但實在太嘈, XX忍唔住入房叫佢唔好嘈, 佢真係唔敢再叫, 淨係行來行去, 反過來我叫佢就唔聽, 唔通我真係天生貓狗奴才? 好驚佢太嘈 d街坊會投訴, 真係要諗下計, 不過佢真係好痴身, 我今朝夜左佢出黎, 我清理狗籠, 佢居然無周圍行, 係咁痴住我

希望佢快d融入我地的大家庭啦
,

又多一名家庭成員了

今次係一隻toy poodle, 其實想養好耐了, 因為好驚買到病狗, 買狗比買貓風險更大, 經過買呀妹的經歷, 真的心有餘悸, 唔敢太衝動, 做左好耐reseach, 原本搵左一個breeder都好多人幫佢買, 約埋佢今個weekend睇狗, 但之後係一個blog見到有人話佢賣左佢訂左個隻狗比第2個, 搵另一隻代替, 講真, poodle個樣真係隻隻差唔多, 比佢換左真係唔知架, 所以又開始遲疑,

今日同樓上同事講開我想買poodle, 佢介紹左我屋企附近一間小型petshop, 佢話佢細妹同店主好熟, 信得過, 今晚同xx去睇下, 無諗過會買, 但一進場, 便見有一團朱古力的物體跳來跳去, 漸漸被他吸引了, 其實另外還有2隻2個月大的red toy poodle, 都好活潑, 但自問佢地太細了, 驚take care唔到佢, 小朱就5個月大, 比較易接手, 同店主傾狗經差可多二十分鐘, 有些途人入店睇狗, 都覺小朱好可愛, 開始有少少驚他被別人買下, 所以同xx決定要擁有他, 見他驚人的食量同埋正常的便便, 心理亦安心少少, 星期六接佢回家了, 希望佢同幾隻囝可以快d 互相接受啦

這個細佬太百厭

成日偷入廁玩, 又伸手玩水兜的水, 佢好似老頭子咁固執, 佢要做的野你點駡佢都阻止唔到, 佢轉過頭趁我唔為意, 就走去做, 真係拿他沒辦法, 佢老豆係度真係乖好多, 人善被貓欺又一引證

細佬慘變三文冶

尋晚去完晚街返屋企, 一開門3隻小豬照舊企晒係門口, 關門前明明見晒3隻豬無走漏出街, 跟住放底個袋, 係個廳擾攘一陣, 換埋衫出黎, 一直都唔見細佬踪影,見到其他兩隻豬望住個門口, 心知不妙, 一開度大門, 成個物體撲左落黎然後走左去, 原來個衰豬做左三文冶, 好彩佢無阿B咁肥, 唔係就夾死佢

澳門美食行

我同x先生向來都好為食(見我地的身材就知啦 ) , 睇左阿蘇個幾集美食特輯, 就心癢癢想試下, 不過好多都係比佢講到有少少誇張, 其實個日都幾悶下 , 賭場我又唔鍾意去, 真係淨食, 用的錢夠去台灣了, 下次都唔好搞阿姐
三元粥品 - 招牌肉丸粥 (好似兵兵波咁大粒, 用埋用手刴, $18 碗超抵食)


黑沙灣 - 法蘭度餐廳 (炭燒朱仔包大大個免費任食, 鹽燒排骨燒得好好味 , 炒蜆好多沙, 燒牛仔肉好似柴皮 )





全日最正的- 陶陶居 (2人份量 $550/6兩翅, 啖啖都係翅, 湯味濃. 蟹盒炸完沒有半點油膩感, 入口即溶 ) 到澳門一定要去呢間, 誠意推介

阿妹絕育了

昨天帶了阿妹去Betty處絕育, 呢幾日都要困住佢同帶大喇叭, 先到佢無哂心機, 今晚放左佢出黎伸一伸腳, 個衰豬一出黎就好似甩繩馬騮咁, 周圍走又跳上貓樹, 跟住又聊細佬玩, 嚇得我即刻困番佢, 一入番籠就即刻做叭地熊, 真係識扮野, 不過希望佢快d埋口啦

靚靚牛奶妹

前排學人係prints 買左幾張超貴的靚靚花紙, 諗住試下幫佢地影下沙龍照, 拖左成幾個星期, 終於挑走條懶根, 幫佢地同我心愛的牛奶妹影左幾張, 對於我呢個影相初哥, 效果都算唔錯, 佢地幾隻, 我錯得細佬最有模特兒細胞, 一d都唔驚鏡頭, 可能佢一向都係"懶得理你"的性格, 所以影相都好定下, 阿B就煩, 次次都玩野, 一見到鏡頭就瞇起對眼, 轉同你作對咁, 阿妹又係無時停個D囉~~~

大閘蟹萬歲

今年第一次食大閘蟹, 雖然身上的癬仲未好番, 但唔理得咁多了, 依家唔食, 拖多2拖過左時又無得食了~~~, 聽好多人都讚永富d蟹唔錯, 帶阿妹去睇醫生時, 順便買了幾隻, 佢分 100/4 , 100/3(足4.5兩) , 跟住再上就 $200/斤了, 買左100/3隻試下先, ok得話下星期帶阿妹絕育再買大隻d(佢地叫 joe 鮑/荷媽 wor), 唔知TVB會唔會收佢地版權呢, hehe~~~~~, 返到屋企即蒸即食, x先生唔食蟹, 所以我一個食晒3隻, 2隻公一隻女, 我比較鍾意食公, d膏好滑,但唔知係咪今個月係食女, 公反而無咁多膏, 不過, 永富無令我失望(d伙講d 膏可以比美大隻wor), 食完真係好滿足, 不過得我一個食少左d樂趣囉,都係大班人一齊拆蟹開心好多

我的叭地貓與豪華臀

成個月無寫blog了, 因為實在太忙太累, 佢地4隻豬的癬患仍然未清理好, 搞到我有些氣餒, 阿妹開始大個女了, 個樣越黎越lady, 仲好鍾意學叭地熊, 不過前日睇醫生, 醫生話佢太輕了, 我同醫生講佢的種就係咁細, 醫生話佢6個月有多, 應該大定了, 哈哈, 那麼就做我的掌上貓吧, 不過佢貼埋阿B度, 真係好迷你, 阿B越來越虎背雄腰了, 佢個豪華臀好似個足球咁大, 好肥美呀, 依家越來越巴閉, 半夜叫我開門比人入黎瞓, 嗲一陣, 又叫我開門比佢出去, 比佢激死

細佬仲好笑, 次次幫佢搽左藥帶住個大喇叭得鐘數時, 佢就會跳係我面前然後企左係度, 個頭傾前然我啤住我, 真係比佢笑地, 個衰豬唔聲唔聲越來越搞野

細佬, 阿B, 阿肥快D 好番啦, 媽媽好倦呀

細佬困籠已一星期了, 見到佢憂鬱的樣子, 我就好心痛, 但又唔可以放佢出黎, 搽左一個星期藥, 沖左2次藥水, d癬好似好左好多咁, 亦無擴散跡象, 佢真係好慘, 依家仲著住衫仔, 唔比佢著佢就會抓到損晒, 但成日著住件衫, 患處又好得會慢d, 真係好矛盾
呢排比4小福搞到我晚晚成9點幾十點先食飯, 沖涼, 阿B 隻耳仔好唔隱定, 明明今日無咁紅, 第2日又紅番, 唯日繼續幫佢搽藥膏啦, 阿肥直情2隻耳仔無晒毛, 我每次都要幫佢用洗癬藥水洗左耳仔先搽藥膏, 放工返到屋企, 就要清砂盤, 幫佢地搽患處, 清潔佢地, 餵佢地, 搞下搞下就9點幾十點, 先有空打理自己, 藥都唔記得食, 真係好倦, 幾隻豬仔, 快D好番啦, 唔好要媽媽咁辛苦啦~~~~
阿妹返左屋企都成個月了, 依然唔鍾意其他貓接近佢, 但開始痴我了, 我用電腦時, 佢就會坐係我腳旁, 滿窩心的 ^ ^, 佢食量好大, 拍得係細佬, 又係好似細佬咁食極都唔肥, 但 woo ree 的情度比細佬更甚, 大大完唔埋沙, 食野食到成地係啦, 佢係女仔嘛, 真丟臉 >.< 都唔知點train 佢好, 真係對佢又愛又恨

補祝生日會

X先生正日唔得閒,所以今日補番生日會, 雞手鴨腳, 點左爉燭影相時, 嗅到有陣燶味, 原來阿B同細佬D 鬢燒到, 好彩無咩事, 不過就髦左, 影左D相原本好多張都手震, 但蛋糕已經食左, 無得救了, 好彩有張用得, 唔係真係唔知點算好了

細佬,阿B 生日快樂

細佬同阿B牛一啦, 話咁快大個仔了, 回顧同佢地渡過呢9個月, 由好細隻好baby的樣子, 漸漸變成壯大及成熟, 感覺真係好奇妙, 佢地照亮了我的生命, 令我的人生更加美滿, 希望佢地能健康快樂繼續成長, 陪我一起往前走, 我會盡我的努力帶給他們最好的

表妹攞到28分驕人成績, 舉家去慶祝

尋日會考放榜, 阿恩考到28分驕人成績, 雖然英文成績稍為遜色, 但我覺得真的好勁了, 她很不滿意英文result, 有點不快, 她要求太高了, 她比自己太大壓力了, 誰也勸不了她, 希望好快些放鬆心情, 畢業已是事實, 有時考試真的要努力加上運氣, 可能今次欠缺少少運氣, 但佢就讀的學校是全港中文學校頭幾位, 佢的成績係文科全級第2 , 我覺得對佢自己已有一個好好的交待了

昨晚全家替她慶祝, 舉家到流浮山一間叫愛民的餐館食海鮮, 之前catherine食過覺得好抵食, 呢間係以人頭計, $250一位, 真的有很多海鮮 , 包括蚧, 蝦, 賴尿蝦, 班, 拳頭大的鮑魚, 聖子, 扇貝.......等等, 個個食到反轉個肚都食唔晒要打包, 味道很不錯, 尤其碟炒飯, 好乾身,蝦又大, 每人包 一罐汽水,真的抵食過buffet, 可皆忘記影相, 下次有機會一定會再去擦餐飽

過了忙碌的幾天

呢幾日忙到喘不過氣, 星期六帶左細佬去做公公, Dr Betty的手勢真係唔錯, 細佬的傷口好細,又無阿肥咁論盡搞到有血水, 不過阿B同阿肥唔知係咪認唔到佢陣除, 係咁狂趙佢, 阿B仲搞傷細佬隻眼

講番野田妹, 佢似乎開始接受阿B及 細佬, 起碼佢地2個行埋去無fee同wu, 不過阿肥佢就好驚佢, 阿肥又唔多接受佢, 可能已幾2歲幾了, 要多d時間

星期日幫阿妹影左幾張照片, 比起上星期好樣左好多, 隻眼都有好轉。

細佬今日做左公公了

今日帶細佬去Dr Betty處desex, 今朝11點見完醫生, 下午4點已經可以返屋企, 衰豬其實十分累, 但太貪玩同太八, 一直都唔肯靜低休息, 食埋時仲作嘔, 嚇死我, 雖然係正常反應, 但佢係我心肝, 真係好擔心架, 終於感受到為人父母, 子女有病痛時內心的感受, 今日真係好累, 又要take care細佬, 阿妹又要照顧, 晚上xx又話要去九龍城食火鍋, 唔想掃佢興為有捨命陪君子, 成晚都無咩食欲, 阿妹隻耳仔好似有d發炎, 抹左成個星期,都好污糟, 過幾日再係咁就要去醫生處取藥了, 勁累呀~~~~

野田妹回家第三天

尋日天氣酷熱, 阿肥始終好唔妥野田妹, 所以我就將野田妹放籠, 阿B同細佬放埋入書房開冷氣, 阿肥就係廳無開冷氣, 但估唔到下晏真係咁熱, 好擔心阿肥中暑, 放工返去到,見阿肥五體投地貼住塊面係地下, 好哀怨咁望住我, 我好歉疚, 安慰左佢好耐, 比左好多魚干佢食, 媽媽以後都唔敢啦, 零願腐乳送飯都留返D錢比你涼冷氣啦。
開左房門, 3隻豬都安好, 係2兄弟將3層高籠頂的野掃晒落地姐, 野田妹見到我好high, 用手拍籠門叫我開門比佢, 於是我趕左2兄弟出廳, 放佢出黎, 佢真係好搞笑, 我走到邊, 佢係咁跑跟住我, 好似狗仔咁, 抱起佢時由頭到腳都貼住我, 佢真係好嬌小, 比當初細佬返屋企時仲細粒成1/3, 但當時細佬細佢成個月, 睇黎佢已接受左我做佢的媽媽了, 但對佢地3兄弟, 仍好有戒心, 阿B成日矇下矇下貼塊面埋去, 阿妹就係咁 “wu” 佢, 一副 “你就行埋黎,我就唔客氣”的款, 阿肥就有少少進步, 雖然仲係間唔中行埋個籠度, “ha” 佢跟住一手抓落個籠度想攻擊阿妹, 但比起第一日直情唔敢入房, 家下陰濕躲埋係房門後面已有進步,。希望佢地快些match, 咁我就唔使開2部冷氣咁甘啦

野田妹回家的第一天

今朝嘗試將阿B, 細佬放入書房, 觀察牠們相處情況, 可能異短具有波斯貓的溫純性格, 大家除了保持距離外, 並沒有打架, 順利過了一關

但阿肥就慘了, 野田妹突然走出廳外, 阿肥可能覺得地盤被侵佔同埋驚(佢一向細膽), 所以勁"feel" 佢同埋伸爪爪佢, 嚇得我即刻捉番阿妹入房, 阿妹亦不是善男信女, 我叫x先生捉住佢同阿B,想影一張龍兄鼠妹, 但一拍埋, 阿妹就向阿B發惡, "feel"佢仲一野咁抓落阿B塊面, 幾驚整傷阿B隻眼, 嚇到阿B即刻走開, 睇黎都好間離佢十日八日先得, 不過佢今日識得去開大同開細, 大大都很正常

尋日醫生比左支眼膏同眼gel我, 激死, 番屋企一睇, 原來係我在藥房同公平行買的一樣, 貴成倍價錢, eye gel原來同人用的一樣, 唉, 又浪費晒d 錢錢了

野田妹來了!

一波三折, 野田妹終於可以跟我回家了, 生癬, 眼球被抓傷, 幾次都以為可以跟我回家之際又出現了事故, 由2個半月大等到現在4個多月大了, 也曾想過不如放棄, 因為失望了很多次, 但實在不捨得, 很喜歡她, 眼睛護理了2星期, 仍有少許未康復, 決定取回家自行照顧了, 因再大點她及兄弟們會難適應, 離開貓舍, 馬上帶到獸醫處檢查, 原來耳道入面有少少發炎, 有少少高溫(不過可能天氣太熱了), 便便含菌量偏高, 醫生建議要食乳酸菌, 眼睛日後可能會有少少疤痕, 但所有問題不算嚴重, 我都即時鬆一口氣, 呢間獸醫都算幾詳 細, 比pet central 詳細得多, 醫生有取便便驗查, 頗細心的,
野田妹睇症期間, 表現了野田妹獨特性格, 每做一個step, 檢查耳朵, 取便, 抽血, 都慘叫極力掙扎, 因為她太嬌小, 所以好似濕水欖核咁, 2個男人都按佢唔住, 真係無鬼用

返到屋企, setup好所有野放佢入籠, 無閉門, 3位哥哥只顧睡覺, 好像唔有察覺到有新成員到臨, 後來阿B發現了, 但懶洋洋的沒有甚麼反應, 又走去做夢了, 希望他倒醒來不要有太大的反應, 唔係佢地就少了活動地方用了

現在最希望佢地以後能和平相處啦

天使治療

總覺得跟animal talk 有困難, 無法集中, 一直以來個人非常疲倦, 自覺本身太多負能量, 剛巧班上同學在動物溝通上亦遇上一點困難, 她找了一位Divine Worker - Kryon 替她做了一個冶療, 而效果非常理想。
昨晚約了時間上了這個工作室冶療, 還未有甚麼交流, Kryon 的天使已告知他我大約的性格, 我主要的目的是希望除去自己的負能量, 及增加自我能量可以做到動物溝通, 經過一小時天使治療, Kryon 總結了天使給他的訊息, 講出了我本身所欠之處(如心散, 質素自己的能力等), 我真的嚇了一跳, 竟然有95%正確, 跟著指導我每日如何自我治療, 真的很厲害

動物傳心術

懶左成幾個月, 實在太多事情要記下, 所以要下定決心寫bolg, 呢幾個月, 仔仔不經不覺已大左好多, 阿肥越來越隱重, 阿B越來越識 氹人, 細佬都係仍然唔多理人, 但又愛搞事
呢幾個月最特別的事情就是上了"動物傳心術", 目的是希望能夠同幾隻仔溝通, 好想知佢地諗咩, 但實際上原來最好不要問自己的寵物, 因為存在主觀性, 好彩能值著幾位同學的幫助, 知道了牠們的想法, 而我可能負能量太多, 所以溝通上比較困難, 導師rosina話我成日好倦咁, 傳心係要好多energy, 要我首要是先搞好自己的狀態, 才會在溝通上有改善。 通過用對話溝通的方式, 我很多時都無法接線, 但當上了level 2, 因為前一晚很早休息, 當日精神都幾好, 所以進行"自動繪畫"及"自動繒圖"時較得心應手, 尋找"動物守護神"及"前世"都沒有遇到很大的困難, 有些同學己報了level 3, 但對我來說, level 2 已經足夠了, 因為我的目的只是想尋找能與我的仔仔溝通的渠道罷了

回說起來, 以下是同學跟我的仔仔溝通的內容 :

• 問 : 阿肥, 你去媽咪屋企前, 係咪有些唔開心的事情, 令到你現在仍慬慬於懷? 少少事務都令你好 緊張怕被傷害?

同學見到的影象 : 被一個瘦的中年男人打

• 問 : 阿肥, 點解你要痴住個盆邊痾便便呀, 痾到出左盆外
• 阿肥 : 盆中間底部有水 (污糟)
  同學答 : 你媽媽返工己經好辛苦, 你痾到咁你媽媽要好辛苦幫你清潔架, 你下次試下行前少 少啦.
  阿肥 : 好呀 (之後就無痾左出盆外了, touch wood)
  
• 問 : 細佬, 點解你成日唔理媽媽呀, 又唔比佢抱, 成日都唔開心的樣

細佬 : 佢鍚晒阿肥, 成日比一粒粒的野食(三文魚粒), 阿肥好多, 我好少 (事實係佢口太細,一定要食細粒), 成日比阿肥跟入廁所, 又唔准我入 (寃枉呀, 係佢自己唔入咋), 我唔鍾意阿肥, 阿B仲衰, 成人搶我D野玩, 唔比媽媽抱 ? 唔鍾意咪唔比攞, 我有同佢講野,佢聽唔到之嘛

跟住好神奇地, 自從同我同學傾完後, 痴我多左,有時仲主動叫我, 瞓係我隔離tim

我會繼續努力, 練習多d, 希望可以容易d同佢地溝通啦

學識縮相了

今朝去黃金買左2本photoshop CS2 教學, 睇左半日都唔係好明, 呢個媽咪真係幾蠢下, 後來自己開左Photoshop 摸下摸下, 學識左點壓縮同cut相, 己經好開心了

今日阿B比左個大禮我, 佢一向都好有性格, 唔鍾意跟人, 抱住佢過樣好似比人虐待咁,令日我諗住上床瞓一陣, 唔夠一刻, 佢跳左上黎我身旁, 係咁用個頭kiss我, (有史以來第一次), 跟住仲攪住我隻手瞓左, 唔知點解今日會咁益我, 可能特然想要母愛掛~~~

沖涼大作戰

趁今日天氣很好, 同阿B細佬沖涼, 之前同爸B一齊合力沖, 但我今日嘗試左一個人作戰, 對象當然搵細佬, 佢比較易妥協, 之前買左條胸帶諗住沖涼用, 終於用左十分鐘時間先識載, 呢個貓咪真係好鬼蠢, 好彩細佬無咩反抗, 開戰了, 敵方反抗得好厲害, 弊! 條蠅太鬆了, 甩左 @@, 再載過, 「細佬! 唔好郁, 喂 ! 唔好抓我大脾啦! 損哂啦~~~」, 幾經辛苦, 終於打完仗, 點解一次比一次難打 ? 跟住綁住佢同佢吹乾個身, 佢不停咁反抗, 我終於忍唔住好大聲鬧佢, 又撻左佢大脾幾下(係我第一次打佢, 好心痛), 好奇怪, 佢即刻睇住我, 唔敢再有大反抗, 可以順利完成, 但已耗盡了大半氣力了,明天先同阿B打仗
事與願違, 爸 B返到屋企, 我同佢講我一個人可以同細佬沖涼, 點知佢無讚我, 仲話天氣好不如同阿B沖埋, 嘩, 唔係呀, 敵唔過佢的堅持, 唯有開工啦, 呢個阿B, 以前比個Breeder成日同佢沖涼, 應該習慣啦, 上次都好聽話, 今次佢的戰鬥力仲強過細佬, 2人合作都差點應付不來, 爸B唔識用力, 又用錯方法捉佢地, 好鬼驚比佢D蠻力整傷佢地, 但佢又好固執唔聽人講, 所以佢負責捉阿B我都好擔心阿B的安全, 但阿B令次真係太唔聽話, 吹毛時更加發狂, 我鬧佢, 佢都唔理, 唉, 佢地都係食住我了~~~~

今次用左Jerob 的增加蓬鬆觀感潔毛素, 但唔知係咪唔識用 , 好似唔係好見到效果, 激死

今日開張啦

冧冧貓咪開張啦 ~~~

自從有了3隻囝囝後, 一直都好想開個blog, 將佢地的點點滴滴都記載起來, 但始終未有行動, 但終於下定決心了~~~~

自從3隻囝囝加入我的生命後, 每日都過著得忙碌, 比起以前一個人生活的時候充實了好多, 忙碌當中, 有開心有生氣, 真的很感激上天賜給我的寶貝, 我的生命亦因此而精彩起來, 亦感謝3位月baby帶給我的快樂, 我地以後每天都要過得快快樂樂呀